www.prsa.com.pl
21/11/2007

Сяргей Сямёнаў атрымаў па пошце пастанову Вярхоўнага суду, які адмяняе рашэньне суду Гомеля аб прыцягненьні яго да адміністрацыйнай адказнасьці за адмову запоўніць мытную дэклярацыю на расейскай мове. Судзьдзя прысудзіла Сямёнаву штраф у памеры 30 базавых велічыняў.

У размове з нашым радыё Сяргей Сямёнаў сказаў, што яго поўнасьцю задавальняе рашэньне Вярхоўнага суду, але цяпер ён намераны абскардзіць дзеяньні судзьдзі Дамненкі ў Міністэрстве юстыцыі.

С.Сямёнаў: Зараз будзем падаваць дакумэнты ў Міністэрства юстыцыі, каб яны праверылі, ці судзьдзя Дамненка Марыя адпавядае сваёй службовай пасадзе. Мне вельмі не падабаецца, што мяне асудзілі проста так. На маю думку, судзьдзя не павінна працаваць судзьдзёй.

Сяргей Сямёнаў дадаў, што цяпер, падчас перасячэньня мяжы, яму прапануюць дэклярацыю на беларускай мове, але, на жаль, з шматлікімі граматычнымі памылкамі. “Прыйдзе час пазмагацца й за чысьціню мовы, калі ўдасца прыняць адпаведны закон”, - сказаў наш суразмоўца.