www.belpa.org
15/01/2008

Жлобінскія дэмакраты рыхтуюць заявы на правядзеньне пікету ў абарону Партыі камуністаў Беларускай. Арганізатары распавялі карэспандэнту belpa.org, што дадзеная акцыя ладзіцца ў межах агульнарэспубліканскай кампаніі салідарнасці.

Паводле словаў жлобінскага актывіста Марата Афанасьева, група жыхароў гораду падпісалася пад заявай на правядзенне акцыі ў падтрымку апазыцыйных камуністаў. «Дакумент быў адпраўлены ў гарвыканкам па пошце замоўным лістом адмыслова, каб чыноўнікі з гарадской адміністрацыі не паведамілі пасля, што ніякай заявы да іх не прыходзіла», - патлумачылі ініцыятары пікету.

Заяўнікі мерапрыемства сумняюцца, што мясцовыя ўлады пойдуць ім насустрач. Рэч у тым, што за апошнія некалькі месяцоў ніводная з 20 заявак, якія падавалі жлобінскія актывісты АДС, не была ўхваленая. «Станоўчага адказу ад гарадскіх чыноўнікаў мы так і не пачулі. Кожны раз нам прыходзілі адмовы, падпісаныя старшынём альбо намеснікам старшыні выканкаму. Спрабавалі з імі нават судзіцца, але таксама безвынікова, -- распавядае Афанасьеў. - На адным судовым пасяджэнні інтарэсы мясцовых уладаў у судзе прадстаўляў юрысконсульт выканкама, які заявіў, што арганізатары пікетаў распальваюць нацыянальную варожасць і дэстабілізуюць сацыяльную сітуацыю ў раёне. Мы паспрабавалі апратэставаць словы прадстаўніка ўладаў, запісаныя, дарэчы, на дыктафон у абласным судзе, але і там не дамагліся справядлівасці».