www.svaboda.org
10/07/2008

Аляксандар Мілінкевіч асабіста знаёмы зь некаторымі затрыманымі КДБ былымі сябрамі “Белага легіёну”. Ён запэўнівае, што сьледзтва ступіла на памылковы шлях.

“Белы легіён” ніколі не займаўся падрыхтоўкай тэрарыстаў, гэта была вайскова-патрыятычная арганізацыя, якая ўжо гадоў 5 не дзейнічае. Там людзі займаліся спортам, вывучалі гісторыю, мову. Я ведаю многіх з гэтых людзей, я супрацоўнічаў зь імі і не лічу, што гэтыя людзі на штосьці такое могуць быць здольныя. Гэта нармальныя беларускія патрыятычныя людзі”.

Спадар Мілінкевіч цалкам адкідае вэрсію, што нібыта актывісты апазыцыі могуць быць датычныя да выбуху 4 ліпеня ў Менску.

“Гэта не ў стылі актывістаў грамадзянскай супольнасьці, і за апошнія гады мы прадэманстравалі, што выступаем выключана за мірны шлях, за мірныя акцыі пратэсту і грамадзянскае непадпарадкаваньне”.

Але на думку Мілінкевіча, ва ўладзе ёсьць людзі, якія хацелі б у сувязі з выбухам пачаць кампанію ціску на апазыцыю.

“Я лічу, што гэта вельмі памылковы шлях, Беларусь зараз у такім стане, калі трэба аб’ядноўвацца нават людзям розных поглядаў, і калі незалежнасьць Беларусі, напрыклад, пад пагрозай, у бліжэйшыя гады можа вырашыцца лёс Беларусі, то трэба не дзяліцца на чужых і сваіх, не шукаць ворагаў, а спрабаваць аб’яднацца, і тым больш не імітаваць вось такія сьледзтвы”.