www.svaboda.org
16/07/2008

"Ці верыце вы, што выбары ў Беларусі будуць свабоднымі, справядлівымі й празрыстымі?” На гэтае пытаньне адказваюць жыхары Гомеля.

Спадар: “На выгляд будзе ўсё добра. Але ж мы ня ведаем, што робіцца за шырмай”.

Спадарыня: “Ніводныя выбары нідзе ў сьвеце не былі справядлівымі”.

Спадар: “Наўрад ці… У нас нічога няма справядлівага й празрыстага. Будуць падтасоўкі. Усё так!”

Спадарыня: “Не! Бо ў нас выбіраюць тых, каго ўжо вызначылі”.

Спадар: “Улады заяўляюць, што будуць справядлівымі. Калі ўлічваць досьвед мінулых гадоў, бярэ сумнеў”.

Спадар: “Мяркуючы па апошніх падзеях — усіх гэтых арыштах, ня думаю, што выбары будуць празрыстымі. Такое маё меркаваньне. Зноў сьпіхваюць усё на апазыцыю. Зноў-такі апазыцыянэры ў нас, як заўсёды, беспрацоўныя. Ад выбараў іх штучна адхіляць. Таму ня думаю, што выбары ў нас будуць празрыстыя — як і ўсё, што робіцца ў нас у апошнія гады”.

Спадар: “Дакладна ня ведаю, але, магчыма, Лукашэнка так асьмялеў, што пойдзе на празрыстыя выбары. У апазыцыі ўжо няма той моцы, якая магла б яго зьбянтэжыць, зрушыць зь ягонага месца”.

Спадар: “Верагодна, будуць. У нас жа заўсёды паказваюць вынікі выбараў”.

Спадар: “Думаю, што будуць. Я ўпэўнены ў нашай палітыцы”.

Спадар: “Думаю, што не”.

Спадар: “У нас, падаецца, нічога такога справядлівага й празрыстага няма. Выбары ёсьць выбары. Па справядлівасьці ўсё адно ня будзе. Махінацыі ўсё роўна ўчыняюцца. Людзі сваю справу робяць. Хтосьці праз галовы палезе ўсё адно”.

Спадар: “Антураж будзе. А справядлівасьць? Сумняваюся!”

Спадарыня: “У нас у краіне ўсё так добра арганізавана, што будзе ўсё празрыста й даступна для людзей”.

Спадар: “Не задумваюся над такімі пытаньнямі. Схаджу на выбары — і справе канец”.